Hornfirska skemmtifélagið

Nú fer Norðurljósablúshátíð okkar Hornfirðinga að bresta á en hún hefst næstkomandi fimmtudag og stendur fram á sunnudag. Hátíðin er sú fimmta í röðinni en í ár verður í annað sinn frítt  inn á alla viðburði hátíðarinnar.

Þetta árið munu heilar tólf hljómsveitir sjá um að skemmta bæjarbúum og koma þær allstaðar af landinu. Þessar hljómsveitir eru Johnny and the rest, Tommi - einstaklingshljómsveit, Mogadon, Blússveit Þollýar, Blúsvíkingarnir, Kærleiksbirnirnir,  Hulda Rós og Rökkurbandið,  Mæðusveitin Sigurbjörn, Band #228, the Cha cha chas, MIRI og VAX piltarnir, en þeir ættu nú að vera Hornfirðingum vel kunnugir. Skemmtunin hefst á fimmtudagskvöldi á Hótel Höfn. Á föstudags- og laugardagskvöld munu tónleikarnir dreifast á milli Hótelsins, Kaffihornsins og Víkurinnar.

Í hádeginu á föstudag verður boðið uppá blússtemningu í Nýheimum og á laugardag munu tónlistarmenn taka lagið í sundlauginni milli kl. 14 og 15. Þá verður hið geysivinsæla Blúsdjamm að sjálfsögðu á sínum stað í Nýheimum á laugardeginum milli kl. 16 og 18 en þar gefst gestum og gangandi kostur á að láta ljós sitt skína og taka nokkur lög ásamt því að gæða sér á kræsingum frá honum Gauta.

Þetta árið var ákveðið að hressa upp á einkennismerki hátíðarinnar og sá hann Daníel Imsland um það. Nú þegar er hafin sala á bolum merktum hátíðinni í Nettó og eru allir hvattir til þess að verða sér út um einn slíkan áður en þeir seljast upp.

Eins og hin fyrri ár þá er um samstarf milli Hótel Hafnar, Kaffihornsins, Víkurinnar og Skemmtifélagsins að ræða ásamt því að fleiri utanaðkomandi aðilar styrkja hátíðina á ýmsan hátt. Má þar nefna Sveitarfélagið Hornafjörð, Menningarráð Austurlands, Flugfélagið Erni, Nettó, Dimms design og fleiri.

Vonumst við til þess að sem flestir sjái sér fært að mæta og njóta hinnar frábæru tónlistar ásamt því að skemmta sér í góðra vina hópi.

Dagskrá hátíðarinnar má nálgast hér.

Undirbúningsnefnd Norðurljósablúss 2010

Blúshátíðin Norðurljósablús verður haldin í fjórða sinn á Höfn í Hornafirði dagana 5. til 7. mars næstkomandi. Það hefur sjaldan verið meiri blús í íslensku samfélagi en einmitt um þessar mundir. Fólk hefur í gegn um árin notað blúsinn til að syngja sig frá erfiðleikunum og gleyma stað og stund í tónlistinni og þannig verður það á Norðurljósablús. Til þess að gefa sem allra flestum tækifæri á að finna blústaktinn í hjartanu verður frítt inn á alla tónleika hátíðarinnar.

Laugardaginn 4. október n.k. frumsýnir Hornfirska skemmtifélagið sýninguna Bítl á Hótel Höfn.  Þetta er sjöunda haustverkefni Hornfirska skemmtifélagsins á Hótel Höfn en áður hefur félagið sett upp sýningarnar Slappaðu af!, Með allt á heinu, Diskó, Rokk í 50 ár, American Graffiti og Eitís.  Auk þess hefur félagið staðið fyrir blúshátíðinni Norðurljósablús árin 2006, 2007 og 2008.

Miðasala er á Hótel Höfn í síma 478-1240.  Þar fást einnig upplýsingar um gistingu og ýmsa afþreyingarmöguleika sem í boði eru á staðnum.

Opnunartónlekar blúshátíðarinnar Norðurljósablús 2008 verða með hornfirskum formerkjum í ár.  Skemmtifélagið leitaði til hornfirska saxófónleikarans Ómars Giuðjónssonar sem brá skjótt við og hóaði saman í band sem nefnist ADHD 800.  Tónleikarnir verða á Hótel Höfn sem hefur verið dyggur samstarfsaðili Hornfirska skemmtifélagsins um árabil.  Hótelið hefur allt verið endurnýjað á síðustu misserum og er glæsilegra en nokkru sinni fyrr.

Norðuljósablúsinn er stöðugt að vinda upp á sig og í ár bætist Humarhöfnin í hóp þeirra veitingastaða sem taka þátt í verkefninu með Hornfirska Skemmtifélaginu.  Eins og nafnið bendir til, sérhæfa meistarakokkar Humarhafnarinnar sig í matreiðslu á Hornafjarðarhumri. Laugardagskvöldið 1. mars verður haldið humarblót á staðnum.  Þá geta gesti borðað humar eins og þeir geta í sig látið fyrir aðeins 3.500 krónur. 

Á laugardagskvöld frumsýnir Hornfirska skemmtifélagið söngleikinn Eitís eftir Felix Bergsson í leikstjórn Kristínar G. Gestsdóttir á Hótel Höfn.  Eitís er sannkölluð sápuópera í anda Dallas og inn í hana fléttast nokkur af þekktustu popplögum níunda áratugarins.

Meðal annars má heyra Wake me up before you go go og Material Girl en einnig gamla rokkara á borð við Final countdown og Money for nothing.  Íslensk tónlist hljómar líka í söngleiknum, Pamela í Dallas, Útihátíð og Draumaprinsinn svo dæmi séu nefnd.  Tónlistarstjóri er Heiðar Sigurðsson og koma sjö söngvarar og leikarar koma fram í sýningunni auk fimm manna hljómsveitar og þriggja bakraddasöngvara.  Alls koma 23 að sýningunni.

Ein stór fjölskylda
Í sýningunni koma fram söngvarar, leikarar og tónlistarmenn sem taka þátt í uppfærslum skemmtifélagsins af áhuga og fæstir hafa nokkra menntun í listum að baki.  Það er sérstakt við þessa sýningu að í henni taka þátt feðgar, mæðgur, systur og feðgin svo aldurshópurinn er dreifður en allir vinna saman sem ein fjölskylda.

Helgarpakkar til Hornafjarðar
Í tengslum við sýningarnar verður boðið upp á pakka sem henta vel starfsmannafélögum og fleiri hópum sem vilja leggja land undir fót og gera sér dagamun.  Í pakkanum er gisting á Hótel Höfn, kvöldverður, tónlistardagskrá og dansleikur.  Að auki er ýmis önnur afþreying í boði á staðnum og er hægt að sérsníða afþreyingarpakka ef óskað er.

Sex ára saga
Þetta er sjötta verkefni Hornfirska skemmtifélagsins sem sett er upp á Hótel Höfn.  Þar fyrir utan er alþjóðlega blúshátíðin Norðurljósablús sem haldin er í byrjun mars ár hvert á öllum veitingahúsum Hafnar í Hornafirði. Hornfirska skemmtifélagið hefur einnig tekið að sér ýmis önnur verkefni, svo sem umsjón með ýmusm skemmtunum og haldið námskeið í viðburðarstjórnun.

Skapandi iðnaður á Hornafirði
Hornfirska Skemmtifélagið er einn af stofnendum Ríkis Vatnajökuls ehf, Ferðaþjónustuklasa Hornafjarðar.  Eitt af markmiðum skemmtifélagsins er að laða ferðafólk á staðinn utan hefðbundins ferðamannatíma og auka veltu í þeirri grein en aðalmarkmið félagsins er einnig að gefa söngvurum og hljóðfæraleikurum á staðnum tækifæri til að þroska sig og bæta með því að koma fram í krefjandi sýningum.

Á myndinni eru frá vinstri: 
Kristón Elvarsson, Ragnheiður Sigjónsdóttir, Maríanna Jónsdóttir, Björn Imsland. Þórður Ingvarsson, Helga Vilborg Sigjónsdóttir og Nanna Halldóra Imsland.  Fremst eru bakraddasöngvararnir Elvar Bragi Kristjónsson, Svafa Mjöll Jónasar og Sólveig Morávek.

Undirbúningur fyrir haustverkefni Hornfirska skemmtifélagsins er kominn á fullt.  Í ár verður tekin fyrir tónlist níundaáratugar síðustu aldar og hefur sýningin fengið nafnið "Eitís".  Það er Felix Bergsson sem skrifar handrit sýningarinnar að þessu sinni og er óhætt að segja að hún verði með töluvert öðrum hætti en sýningar undanfarinna ára.  Sem fyrr verður leikstjórn í höndum Kristínar Gestsdóttur og mun Heiðar Sigurðsson sjá um tónlistarstjórn.  Frumsýnt verður laugardaginn 6. október á Hótel Höfn og er fyrirhugað að sýna á laugardögum eitthvað fram í nóvember.

Í sýningunni "Eitís" verða öll vinsælustu lögin frá níunda áratugnum t.d. Draumaprinsinn, Money for nothing, Our house, Careless whisper, Pamela í Dallas, Wake me up befor you go go og mörg fleiri.  Sýningar Hornfirska skemmtifélagsins eru margrómaðar og í ár verður ekkert til sparað.  Það er því tilvalið fyrir starfsmannafélög, saumaklúbba, vinahópa o.fl. að skella sér í helgarferð til Hornafjarðar í haust.  

Nánari upplýsingar og miðapantanir eru á Hótel Höfn í síma 478-1240.

Forsala aðgöngumiða á Norðurljósablús hefst í dag, mánudag á Víkurbraut 4 en hátíðin verður 1. - 4. mars nk. Á hátíðinni koma fram 36 innlendir og erlendir tónlistarmenn í 8 hljómsveitum.   Aðalgestir hátíðarinnar er sænska hljómsveitin Jump 4 Joy og er þetta í fyrsta sinn sem sveitin leikur hér á landi.  Nokkrir af helstu blús-tónlistarmönnum landsins koma fram á hátíðinni og leika á öldurhúsum Hafnar og í Sindrabæ.

Blúsdrottningin Andrea Gylfadóttir kemur fram ásamt blúsmönnum sínum á Norðurljósablús fyrstu helgina í mars. Andreu þarf ekki að kynna enda er þetta ein þekktasta söngkona landsins.

Blúsmennirnir eru heldur engir aukvisar, Guðmundur Pétursson á gítar, Haraldur Þorsteinsson á bassa, Einar Rúnarsson á Hammond og Jóhann Hjörleifsson á trommur.

Þá mun gítarhetjan Björgvin Gíslason leika á blúshátíðinni og gaman verður að sjá þennan mikla virtúós taka gamla Gibsoninn til kostanna. Björgvin mun leika með hljómsveitinni Kentár á hátíðinni en sveitin fagnar 25 ára afmæli á þessu ári. Einnig verða Park Project, Mood, Grasrætur, Vax, Mæðusveitin Sigurbjörn og sænsku sprelligosarnir í Jump 4 Joy á hátíðinni og blúsdjammið verður á sínum stað í Nýheimum. 

Á myndinni eru Hlöðver Ellertsson bassaleikari Kentára og Björgvin Gíslason í góðum gír.

Undirbúningur Norðurljósablússins er nú kominn á fulla ferð og þessa dagana er verið að ganga frá ráðningu listamannanna sem koma fram á Hornafirði dagana 1. - 4. mars nk.  Aðalgestir blúshátíðarinnar er sænska hljómsveitin Jump 4 Joy  og leikur hún á Hótel Höfn á laugardagskvöldinu.

Hljómsveitin Jump 4 Joy var stofnuð 1992 og hefur sveitin komið fram á 2000 tónlistarhátíðum, tónleikum og klúbbum. Þetta er sannkölluð gleðisveit sem leikur fjöruga blöndu af blús, rokki og boogie og söngvarinn og píanóleikarinn Ulf Sandström er þekktur fyrir að fara hamförum á tónleikum.

Þrjár sveitir som komu fram í fyrra mæta aftur í ár, Mood,hljómsveit Bergþórs Smára, Kentár og Vax sem kom mörgum á skemmtilega óvart fyrir kraftmikla og hráa tónlist og sérstaklega gamaldags hljóm.  Þá mun Mæðusveitin Sigurbjörn frá Hornafirði koma fram á Norðurljósablús og síðast en ekki síst kemur blúshljómsveit Pálma Gunnarssonar, Park Project.  Þar er valinn maður í hverju rúmi, Pálmi leikur á bassa  og syngur ásamt Hrund Ósk Árnadóttur, Gunnlaugur Briem er trommari, Agnar Már Magnússon leikur á píanó og Kristján Edelstein á gítar.