Veisla fyrir rokkara
Andrea Jónsdóttir, dagskrárgerðarmaður á Rás 2 hefur gengið til liðs við Skemmtifélagið og hefur hún umsjón með lagavali.  Andrea er sem kunnugt er einn helsti rokkfræðingur landsins og mun hafa hönd í bagga með Hornfirskum skemmtikröftum. 
Í sýningunni Rokk í 50 ár verður farið í gegn um rokksöguna og þau lög eða flytjendur teknir fyrir sem skiptu sköpum fyrir þróun rokksins.  Hornfirskir skemmtikraftar bregða sér í gerfi jafn ólíkra listamanna eins og Elvis, Ninu Hagen, Jimi Hendrix, Kate Bush, Bob Dylan og Janis Joplin.  Bítlarnir, Nirvana, Led Zeppelin og Queen birtast á nýjan leik á Hótel Höfn og því ætti engum að leiðast á sýningu hjá Hornfirska skemmtifélaginu

Helgarpakkar til Hornafjarðar
Í tengslum við sýningarnar verður boðið upp á pakka sem henta vel starfsmannafélögum og fleiri hópum sem vilja leggja land undir fót og gera sér dagamun.  Í pakkanum verður gisting á Hótel Höfn, kvöldverður, rokksýning og dansleikur.  Að auki verður ýmis önnur afþreying í boði á staðnum.   Samstarfsaðilar Hornfirska skemmtifélagsins eru Hótel Höfn, Gudis ehf, Frumkvöðlasetur Austurlands og ferðaþjónustuaðilar í Austur-Skaftafellssýslu.  Menningarráð Austurlands styrkti Skemmtifélagið myndarlega í síðustu úthlutun sinni.

Blúsinn næstur
Rokk í 50 ár er fjórða verkefni Hornfirska skemmtifélagsins.  Alltaf hefur verið frumsýnt á Hótel Höfn og tvívegis hafa sýningar félagsins verið settir upp á veitingahúsinu Broadway.
Næsta verkefni félagsins er blúshátíðin Norðurljósablús, sem verður á Höfn í Hornafirði 2. - 4. mars 2006.  Þar kemur fram sænska hljómsveitin Emil & the Ecstatics og helstu blústónlistarmenn landsins leika einnig á hátíðinni.  Norðurljósablús er í samvinnu við Blúshátíð Reykjavíkur.

Nánari upplýsingar gefa:
Heiðar Sigurðsson s. 899-4619
Kristín Gestsdóttir s. 898-6701
Sigurður Mar Halldórsson s. 864-0202